In kozman pou la rout

« Shakinn I kont dsi son prop sab pou koup son kann »

1 zwiyé 2016, sanm Justin

Zot i koné sab, sa la pa in zoutiy konpliké. Sa lé sinp vèy pa ! Mé oplis in n’afèr lé sinp oplis, pou manyé ali, i fo ou i pran lo soin, i fo sé ou mèm i done ali son form, son transhan pou li ète bien éfikas. Kroi pa out kamarad va anprète aou in sab é aprésa ou va koup konm si lété la v’ot. Soi ou i tap mové l’androi, soi ou i tap dé kou olèrk inn é out travay la poin lo rannman k’i fo. Sa lé konmsa é pa otroman ! Sa lé vré pou sab mé galman pou tout kalité zoutiy é pou tout éspès dé shoz. Majine in n’afèr : fé dé trouso la klé pou rouv é pou fèrm lo bann mèm port. Donn in moun inn é pran l’ot pou ou. Momandoné fé l’éshanj. L’èr-la ou konm l’ot pèrsone i rikoné pa bien kèl klé i rouv ou bien i fèrm kèl port. Dizon ou i koné out zoutiy é out zoutiy i koné aou : dizon na in sort mazigador rant inn é l’ot, rant out zoutiy é ou. Alé ! ni artrouv pli d’van.

Padport

Signaler un contenu

Inn modékri, inn ti lavi, inn komantèr ?


Témoignages - 80e année


+ Lus