Oté

« Shakinn i mète dofé sou son marmite ! »

In kozman pou la rout

Justin / 2 novanm 2017

JPEG - 43.6 ko

Na poin lontan moin l’antann kozman-la. Mi koné pa si isi i ansèrv sa souvan dé foi, mé sak moin lé sir, sa i tonm konm in vérité pou toulmoun : si ou i vé out z’afèr lé bien okipé, i fo ou i okip sa par ou mèm. An touléka ou zète in zyé dsi sak konsèrn aou. Si ou i okip pa, kisa ou i vé i okip po ou ? Out kamarad ? Out frèr ? Out z’ami ? Lé posib in pé d’tan mé pa toultan. Pou kosa pars l’ot osi na son n’afèr pou li okipé é po li sa lé pli inportan ké tout z’afèr lé z’ot. Lé vré koméla, lé kaziman inposib fé tout out afèr ou tousèl, é ou lé blizé domann kou d’min, mé sa i kontrodi pa nout kozman an-o la. Alé ! Mi lèss azot réfléshi la dsi é ni artrouv pli d’van sipétadyé.