Oté

Shakinn son shé soi, é shakinn i okip son shé soi !

Justin / 10 févrié 2010

Matante Zélida la ékrir Justin :
Mon shèr nové, mon spès salté, koman vi lé ? Sirman in pé malèz ! Pars koté k’bann rouj-de-fon i dévir, nana demoun lé pa d’akor avèk zot. Kisoi pou mèm rézon, k’i soi pou bann rézon la pa parèy. Vi koné, la pa bon kan lé konmsa, pars koté k’ou i tourn, koté k’ou i vir, nana touzour inn nana in kékshoz pou arproshé. Lé normal kan ou i kalkil in pé... plito k’baz déssi gouvèrnman épi donn la min, zot i pans sé zot k’i doi komann lo dévlopman. Foutor mizèr d’in sor, bèf i komann pa la kord, kant mèm !
Tok ! Pran sa pou toi !

Justin la fé pou répons :
Sak lé byin èk ou, sé kan k’mi oi oute l’ékritir, mi koné avann komans lir moin sar pa d’akor avèk ou. Pou kossa d’apré ou ? Dizon, pars ou i nyabou d’ramas toute bann foss bone parol k’i rosanm la vérité, ou i diré k’sé sa, mé lé pa sa ! Soi sé in l’érèr, soi sé in mantri, soi sé in n’afèr pou fé dor aou lé dé zyé rouvèr, pou androg out zizman. Ou i di k’i fo baz déssi gouvèrnman... Byinsir, sirtou kan lo prézidan i domann anou pou fé nout dévlopman par nou mèm... byinsir ni ékoute ali. Mé kan sé li k’i doi fé in n’afèr é ké li pran son tan... L’èr-la, sé nou k’i di ali, prèss in pé lo mouvman. Shakinn na son n’afèr pou fé, ké shakin i fé sak li doi fér é konm li doi fèr. Shakinn shé soi, é shakinn i okip son shé soi.

 Justin