Mésyé, Médam, La Sosyété, koz èk moin sé koz avèk in kouyon-o pyé d’lo mir i oi lo mason. Par l’fète zot i koné shamo, zot i koné galman dormadèr ? Lé pa parèye tou lé dé : inn néna dé boss sé lo shamo, l’ot néna in sèl sé lo dromadèr. In zour moin lété apré voiyaz dann in péi in pé loin, é toudinkou moin la antannn demoun dann train apré kriye « Djemel ! Djemel ! Djemel ! ». Mi rogard épi mi oi in défilé dromadèr apré marsh inn déyèr l’ot avèk in bèl paké dsi lo do. Mi louk azot dann dézèr loin la ba, é mi oi tout néna paké dsi lo do, é tout néna in boss dsi lo do. Mé mi domann amoin pou kosa i di sak moin la mark é dann provèrb-la ? koman I pé sfèr ké shamo I oi solman la boss son kamarad é i oi pa la syène ? Lé posib li oi son do droit konm sète in shoval ? Li la zamé di amoin donk ala pou kosa mi koné pa. Mé sak mi koné sé ké sa i adress pa zanimo, mé demoun, pars in moun li oi défo dsi son kamarad li oi pa la syène é sé konmsa ké li oi li sn défo.L’èrla, in kozman fransé i vien dann mon léspri :”I di pa demoun i oi la paye dann zyé son kamarad é i oi pa piké d’boi dann son prop zyé ? ». Alé ! mi kite azot rofléshi la dsi é ni artrouv pli d’van. Sipétadyé !