Samdi l’ot somènn, moin la parti térin l’aviyon pou rod la famiy. Konm in bonpé Rényoné, moin na la famiy dan la zoréyi, vi k’la parti la-ba pou rod travay. L’èr mi ariv Zilo, sét-èr par-la, l’aviyon AF lé an rotar. Pou tyé lo tan, mi sar bat in karé anlèr pou oir... pou oir si na kèkshoz pou oir. Na poin tro gran-shoz sof bann l’aviyon lé garé. Mi rogard paviyon bann konpagni : zour-la, l’avé kat l’aviyon Air Austral épi in l’aviyon AF. Dan mon kèr, moin lé kontan épi moin na galman in fonn shagrin.

Kontan pou kosa ? Pars, pou in kou, la nyabou fé kèshoz La Rényon. Fé in konpagni, asé for kant mèm, pou anploy plis mil pèrsone, pou ashté bann l’aviyon modèrn, pou komann dé Airbus 380. Arzouté èk sa, Konsèy rézional èk Konsèy zénéral la donn la min pou fé in n’afèr inportan konmsa. Moin lé kontan pars konpagni-la la gingn vanj kont tout lo bann pass-kal la konkirans. AF Ziskakan ? L’èr-la, in fonn shagrin i pran amoin, pars dèrnyé gran batisèr Paul Vergès, banna la bordé, épi la mèt anlèr lo kasèr lo dévlopman La Rényon. Kosa li sava fé avèk Air Austral ?

In pé i di, i fo lèss ali fèr son prèv. Séryé, la pankor fé la ? Nou la pankor vi asé avèk tram-trin, la rokad Tampon, la MCUR, lo rotardman la rout litoral, lo kou la donn nout dévlopman énèrzétik. In démolisèr, sé in démolisèr, sirtou kan bann z’advèrsèr nout dévlopman i donn la min. Mi pans, in pé la-ba AF té kontan vandredi soir ; mi pans bann pétrolyé la déboush shanpagn, moin lé sir bann konprador té fyèr, é bann zournalis la ékri Paul Vergès débarké, ankor plis. Mi pans la fé la fète Konsèy réjyonal… Amizé, bat karé, fé la fèt, dans... dans dann rin volkan.

Justin