Trump sé Trump é lé bien domaz in moune konmsa l’ariv ankor in kou prézidan zétazini avèk konm kroiyanss son péi i sava domine lo mond ankor in kou mé sak lé pli domaz sé ké bonpé d’moune issi la Rényon, antouléka sak i téléfone dsi freedom i partaz in poinnvizé dérassyonèl konmsa… Domaz néna bonpé dmoune i partaz in poinnvizé konmsa i tourn lo do avèk in vérité sinp, démontré par bann syantifik, san konprann sa i fé d’tor limanité — domaz tout lo tan i pèrde dann bann kozman san ké ni tète olèrk mobiliz l’imanité dann la défanss son lanvironeman, épi dann son lotodéfanss.

Lo klima, ni koné li shanj, épi son bann konsékanss dsi la vi dmoune lé riskab d’ète plizanpli dramatik sirtou pou bann péi la zamé profite laktivité imène épi zot nivo d’dévlopman i pèrmète pa zot mobiliz bann zoutiye pou sov in pé myé l’imanité… Zordi ankor, i fo ni rapèl, bann poinnvizé nout kamarad Paul Vergès é toute lo travaye li la fé konm Prézidan l’Onerc. Mi panss li doizète in modèl pou l’imanité dann travaye li la fé ziska son dèrnyé tan d’vi : pou li konbate lo bann kont-vérité é pou la viktoir la vérité dsi l’om résponsab toussa déga ni oi partou dovan nou in pé dsi tout la tèr.

Bann zalman néna in provèrb i di : « manssonz la pate lé kourte » é lé bien vré li lé kourte kan i parl lo shanjmann klima. La vérité va fini par gagn la parti.

A bon antandèr salu !

Justin