Nana bann bon périod, épi nana bann périod pli mol : sa lé vré vréman pou tout zafèr, sa lé vré galman pou bann shanté, épi bann mizik La Rénion. Ni pé dir dopi bann zané 1980 asuiv, nou la konète in bon périod. Ni pé dir dann bann fonnkèr, bann group té i shant pou vréman sak navé dann z’ot kèr.

Souvan dé foi, bann group té i pran in zoli mizik zot té i fé, té i mète sa ansanm zoli parol in moun lavé fé. Alor-la, mi pé dir azot, out kèr té i bate dann out do kan ou té i antann sa ! Tousèl, sansa an parmi.

Lé vré bann group konm Ziskakan, Ousanousava, Bastèr épi d’ot ankor, i trouv pa sa sou la pate shoval. Lé vré galman, shante Albany, Axel Gauvin, épi d’ot ankor té pa in gouyav piké dsi lo pié. Koméla, nana tout in bann group la fine lévé, sinon i sort soman konm ti-bourzon dan la tèr, la pa mal ditou... Finalman, na poin in gran sokré : pou fé in bon shanté-fonnkèr, i fo in mizik, épi bann parol k’i ral, épi i fo in pti flanm défé k’i mète lé dé dakor ansanm, épi, lèr ou antann, i fé mont lémotion, i fé fonn out kèr.
Alor, mi pé souèt bann nouvo in sèl zafèr, sé trap bann zansien déssi la kèstionn so pti flanm défé-la.

Justin