Mésyé, médam, la sosyété, dabitid kan i di kozman-la, i ranplas « bonèr » par « larzan » mé konm zot i koné larzan i fé pa l’ bonèr, moin té i oi pa pou kosa moin noré ékri larzan la plas bon èr. Dabor pou in rézon k’i apartien mon sistèm pansé : larzan kékpar, pou moin, sé lésploitasyon in n’ot koté. Larzan pou inn-in takon - sé in voyaz la mizèr pou d’ot pli nonbré. Astèr larzan-la, moin lé a d’mandé si li pass vréman dovan mon port, sansa si li pass pa. Pars dopi lontan moin lé dsi la tèr é mi pans pa in sharète larzan la fine pass dovin mon kaz kisoi kan moin lété pti, kisoi kan moin lété gran. Zordi moin la fine vyé é si li pass moin lé riskab dir ali : « Pass out shomin ! ». Donk pars lé pi ditou daktyalité. Mé si sharète lo bonèr li pass dovan mon port avèk in zoli zistoir, in zoli fonnkèr, i gayar shanson, mi pans m’a dir ali : « Rant épi alon fèr ! ». Pars, fransh vérité, si néna trézor dsi la tèr, mi pans sa i sort souvan dé foi dann l’am bann poète, dann batman maloya, dann la mizik la voi in shantèr sirtou si li shant bien… Mi kite azot rofléshi la dsi é ni artrouv pli d’van. Sipétadyé !