Médam, zé Méssyé, La sosyété, koze èk mwin sé koze èk in kouyon, mé sé o pyé d’lo mir k’i oi lo vré masson. Mézami, issi dsi la tère néna toute sorte kalité de moune : demoune fran, avèk demoune ipokrite, demoune zantiy épi domoune mové, anfin néna a boire é manzé dann la natir imène. Mé in kalité-varyété d’moune i manke pa, sé la rass sharjèr d’lo.

O fète pou kossa i di sa ? Mi kalkile san trouvé, mi domand Alain Armand mé li di pa mwin, mi domande défin Daniel Honoré dann son somi-lo mo, mé li réponde pa mwin. Néna dann zot liv mé san lésplikasyon ké mi atande. Kossa i vé dire pou vréman ? Sanss prop, pa sanss figuiré ? Mwin néna inn idé mé lé pa sir lé bien korèke.

Zot i koné kossa i vé dir sharjé dann la rolasyon male-fémèl. Zot i koné kan i fé sa sé pou fé pti, sof si ou lé dann in ka linfèrtilité : i di ossi lé klère. Zot i koné kossa i lé larzan d’lo ? Mi panss ké oui. Sanm pou mwin sé la k’i fo rode lésplikassyon… Alé ! Mi arète tèr-la é mi lèss azot trouv dann zot prop rofléksyon é ni artrouv pli d’van. Sipétadyé.