Régilièrman, nana in létid i sorte i amonte koman bann produi konsomasion kourante lé pli shèr isi kan France. Lé sèrtènman vré. Mé, monlavi, la pa sèlman léloignman i gonf lo pri !

Lo pri in produi sé in zafèr sinp pourtan. Si i mèt tout karte si la tab, ni pé voir lo marz sakinn i pran o pasaz avan répèrkite la totalité si lo kouyon d’konsomatèr. Sé poukoué i fo absoliman in lobsèrvatoir dé pri. Mi antan pi parlé d’sa. Pourtan la été voté dan in loi. Akoz okin gouvèrnman i aplik sèt loi la ?

In foi sa di, si lo pri la vi lé vréman pli shèr isi, li lé pli shèr pou toute do moune. Sirtou pou sat nana in salèr ridikil, pou sat zot salèr i anpèrmé pa zot avoir in kont la bank é pou sat la poin salèr ditou. Shèr pou shèr, sé dsi lo pli pov la shèrté la vi i pèz ankor lo plis !!!

Justin