Médam zé Mésyé, la sosyété, néna dé troi zour moin té apré anparl zanimo é zordi kozman-la i vien dann mon tète-pétète moin la invanté mé sof ! An parmi bann zanimo, mi pans lo shien sé tazantan lo myé trété, épi souvan défoi lo pli mal trété. I di pa : fé lo shien avèk in moun ? I di pa : inn vi d’shien ? Antouléka, dann mon majinasyon, mi fé souvan défoi bann prédikasyon pou bann zanimo pars, sanm pou moin, lé pa normal domann azot tan-é-tan é an mèm tan pa rokonète zot mérite… Ankor ké an parmi bann zanimo néna in pé sé d’vré fiy d’gars. Si mi di azot mon pti shien blan téi apèl Sultan-la té i fé in bonpé l’tor dann volaye demoun. Anfin mon kozman i rogard pa tèlman zanimo mé l’moun é konm bann léktèr-léktèz Témoignages i rofléshi bonpé, mi lèss azot kojité dsi kozman moin la mark an-o. Alé ! Ni artrouv pli d’van. Sipétadyé.