Dan listoir ansyène, i parl souvan dé foi bann dis plé l’Egypt, tout pli grav inn ké l’ot, tout pli mové pou la natir é d’moun inn ké l’ot. Lo uityèm, sé bann shipèk — i di osi sotrèl ! Zot la rokouvèr la tèr é la mète la tèr dann fénoir. Zot la manj tout bann plantasyon té i pous dsi la tèr épi tout bann frui dsi pyé d’boi. Tout sak la grèl l’avé pa tyé, zot la tyé. Kan té fini, té i rès pi in tras fèy vèr kisoi dann pyé d’boi, kisoi dsi bann zèrb sinonsa bann plant l’avé fine pousé.

Tout sak i koné in pé listoir rolizyèz i koné so zistoir dis plé. Nana sa dan l’ansien téstaman, mé pou sak i koné pa, m’a rafréshi in pé zot mémoir. Konm Bondyé té i vé bann juif i sort dan l’Egypt pou alé dan la tèr promiz é ké lo Faraon té i lès pa banna alé, li la anvoy dis plé dsi mégaboubou, dsi lo péi ziskatan lo Faraon i désid lès bann juif alé, travèrs la mèr rouj pou réfijyé dan la Palestine.

Pou sak i kroi, zot va pans sé in pinisyon. Pou sak i kroi pa, linvazion kriké, sa sé in n’afèr la fé d’tor l’imanité ziska fé mor d’fin in gran kantité d’moun. Bann shipèk-la, kan sa i lèv, i lèv par milyon, par milyar, zot i tyé vèr é sèk é i arès pi arien pou d’moun. Kan zot lé nonbré é ké zot la bézoin la grès pou voiyajé, na poin arien i anbar azot. La nuit zot i ropoz, lo zour zot i pran zot vol : lo syèl i vien noir, l’aviyon kan i vol lé an danzé, pou finir na pi la nouritir pou d’moun. Kan i ariv pou ramas la rékolt, i amas pi arien.

Nout voizin Madégaskar lé anpoizoné èk sa dopi kèk somèn é in gran famine i ménas la popilasyon. In késtyon sinploman : na poin moiyin vanz kont so boubou-la ? Na moiyin, na produi pou tyé azot, sansa bien diminyé, nana la lite biolojik, mé i fo in bon lorganizasion épi bann produi an kantité. Dé zafèr bann Madégaskar na poin sé tan isi. Son bann parti politik apré fé la guèr inn avèk l’ot, in takon kandida i vé prézant zéléksyon, é pandan éstan-la, é bin, sé la famine k’i anons.

NB : Ala pou kosa Younous Omarjee, dépité éropéin, i domann l’Erop la solidariré par rapor nout bann voizin malgash, pars sé in n’afèr i doi toush anou épi toush l’Erop galman.

Justin