« Shomin baré, i fo rouvèr ali »

Mézami, nou kréol, souvan dé foi, ni kroi dé shoze k’i égziss pa, antouléka lé dir pou prouv légzistanss. Ni kroi tazantan nou lé aranjé, é assiréman ké la bare nout shomin. In shomin anbaré kossa i lé ?

A kou sir, la pa in shomin avèk in baraz galé, mé avèk in baraz invizib : wi sèye sirmonte ali, mé wi gingn pa ; wi sèye fé in n’afèr, mé wi gingn pa, pars néna konm in l’ènmi invizib i anpèsh aou passé. Mwin lé fine oir avèk mon zyé vu, demoune apré sèye passé dann in l’androi na poin okin baraz é zot i ariv pa.

Pou kossa ? Pars zot koko lé bloké, sansa néna in léspri shagrin la drèss in baraz invizib dsi zot shomin ? Pèrsonèlman mi kroi pa sa mé néna d’moun i kroi pou vréman. Lo monde lé divizé an dë, sak i kroi é sak i kroi pa-néna mèm konm di lo poète i kroa-kroa konm lo poète Prévert noré di. Alor, kossa i fo fère ? Mi koné pa tro oziss, é mwin na poin lintanssyon fé léspri for. Pars léspri for, la pa sa k’i manke, mé a mon avi zot forss lé la arienk pou anbriye demoune.

Alé ! Mi kite azot rofléshi la dsi é ni artrouv pli d’van. Sipétadyé.