Mésyé, médam, La sosyété, koz èk moi sé koz èk in kouyon, mé sé o pyé d’lo mir k’i oi lo mason. Mi pans zot i doi konète kozman-la si zot i koné maloya, mèm in pti grin zot i koné sirman kozman-la. Dann maloya i parl shomin Gran-boi. Mé par l’fète kosa sa i vé dir pou vréman : biensir ladan néna Gran-Boi é zot i koné kosa sa i lé ! La-dan i parl shomin pou alé Gran-boi é zot i koné dann tan lété in shomin dir épi in shomin long. Mé sa téi anpèsh pa lo moun ariv dann son l’androi dann inn kondisyon : marsh pti pa, é mète in pyé dovan l’ot. Si ou i fé konmsa ou v’arivé sirman… Dan la vi néna in bonpé shomin Gran-Boi pars néna in bonpé zanbèk pou évité si ou i vé arivé. Sé pou sa konsèye maloya i done anou ni doi bien ékouté, konmsa nou v’arivé. Alé ! Mi kite azot rofléshi la dsi é ni artrouv pli d’van. Sipétadyé !