Oté

Shomin Gran-boi sa lé long, pti pa, pti pa n’arivé

Justin / 1 séptanm 2021

JPEG - 43.6 ko

Lotosifizanss alimantère

Na poin tro lontan, inn-dé somenn par-la mwin la lire in rézolissyon noute parti téi porte dsi lotosifizans alimantère. Toulmoune i koné sa la touzour fé parti lo programe nout parti é dsi so poinn-vizé la, noute parti la zamé shanjé pars sa lé dann lintéré noute toute rényoné.

Mé zordi nou lé pi toussèl pou di l’otosifizanss alimantèr-kissoi la sékirité alimantère, kissoi ankor lotonomi alimantère-kass pa la tète pou lo mo, alon sinploman rogarde lo konténi – néna issi La Rényon in kantité d’moune, talère in majorité d’moune sar dakor èk sa.

Lotonomi dann lénèrji

In n’ote poin inportan dann program parti kominiss é sak mi pé dire sé ké komité santral la gingn plizyèr foi lokazyon pou diskite la dsi kan Paul Vergès lété prézidan la Réjyon, natirèlman sa la rante dann program la majorité lo konsèye réjyonal. Sa lété an bone voi kan gouvernman avèk la droite la sabote lo prozé

Mé bande rényoné pars lénèrji i rést in késtyon frazil bande sabotèr la pa gingn la parti pou vréman é mwin lé sirésèrtin la majorité issi shé nou i domande lotonomi dann lénèrji, in lénèrji prop, in lénèrzi otoktone-konm in pé i yèm dir sa. é lotonomi dann lénèrji i avanss é ankor in kou nou lé pi toussèl.

La lang kréol rényonèz dann lékol

Fitintan demoune téi agonize anou kan nou téi anparl lo kréol konm lang avèk la vokassion rante dann lékol la répiblik. La majorité noute bande konpatriyote lété kont sa mé li l’avé son bande partizan galman é banna téi rèss pa lo bra kroizé dsi léstoma : zot té i rokil pa é zot téi marsh dossi. ziska k’in zour l’Insee épi plizyèr sondaz la romarke in n’afèr la popilassyon La Rényon té fine ariv dann son majorité pou k’i é rante kréol dann lékol ofissyèl.

Toussala pou dire, si out lidé lé just, mèm si la majorité lé konte ou momandoné, kontinyé fé avanss out lidé, rokil pa, marsh dossi é in zour wa oir sé lopinyon d’moune va shanjé. Shomin Gran-boi sa lé long, pti pa, pti pa n’arivé.

NB – Mwin la prande inn-dé légzanp mé mwin noré pu prann galman listoir La Rényon, lo maloya, la plantassyon do ri, lo tram-train, la konpagni bato épi d’ote sizé ankor k’i fé d’noute parti lo pli gran prodiktèr zidé just néna dann nout péi La Rényon.