Oté

« Shomin Gran-Boi sa lé long, pti pa, pti pa n’arivé ! »

In kozman pou la rout

Justin / 6 désanm 2018

JPEG - 43.6 ko

Nout tout i koné kozman maloya mi sort marké moin la. Pou bann zansien, sa in n’afèr zot i koné dopi lontan. Dopi maloya la arlèv la tète. Désèrtin, pli zansien, la di amoin zot la antann sa dann shanson mardi gra : mi fé konfyans vi ké zot té dsi la tèr in bonpé d’tan avan moin épi sak moin lé sir dann shanson mardigra téi trouv tazantan bout-ti bout, bann rofrin maloya. Astèr dsi lo sans figiré, sak moin lé sir, kozman-la néna in sans i dépass lo sans prop, é lé valab pou in ta zafèr ou i antropran dan la vi. Konbien foi in pé i di zot i ariv ar pa fé kékshoz, é kan zot i rant dodan lo travaye zot i trouv lé bien difisil pou finir par fé sak pou zot lété kaziman inposib. Alé ! Mi kite azot rofléshi la dsi é ni artrouv pli d’van. Sipétadyé !