Mésyé, Médam, la sosyété, mi koné pa si demoun la rakont azot shomin paradi épi shomin l’anfèr mé mi pé dir azot kosa mi ansouvien la dsi. I paré apré la mor ou néna dë shomin pou pran : inn lé blaké, galizé, lé dou pou lo pyé é l’ot néna arienk galé pointi, kabos é ba fon. Aou shoizi. Si ou i pran lo bon shomin, firamézir li dégrad, li gate, i fé mal out pyé é an plis si ou la pran sa ou i débark an plin dann la grote Grandyab. Si ou i pran l’ot, komansman ou néna lo pyé an san, ou lé riskab kroir ou i sava mor mé apré in bon distans shomin i aranj, li lé plizanpli gayar, ziskatan ou i ariv dann gayar palé Bondyé.. La vi lé in pé konmsa, si ou i pran tout sak lé gayar, si ou i gnor out dovoir, gnor out prinsip mé o plis i sava, oplis ou i trouv pi arien lé bien po ou é final de kont ou i tonm dann in spès malédiksyon épi in dégou d’la vi mi anparl mèm pa ou. Si ou i pran l’ot, lé dir an komansan mé ofiramézir ou i rant dann shomin out dovoir, lo réspé pou d’moun, la lite kont sak lé mové. Ofiramézir ou i aprésyé out shomin la vi. Alé ! Mi kite azot rofléshi la dsi é sé azot oir kèl shomin la vi zot va pran é ni rotrouv pli d’van. Sipétadyé !