Matante Zélida la ékrir Justin :
Mon shèr nové, mon spès salté,
M’a dir aou, fransh vérité, mi ème byin la fète la mizik é mi trouv in zourné par an pou sa la pa d’tro. Sirtou ké la pa bézoin péyé. Donk sa lé valab ! Mé nana mizik, é mizik. Nana sak lé byin zoli, sak ou i ékoute avèk plézirassyon, é na sak i korsh out zoréy kan ou i antan. Fransh vérité, in joli shanté, in morso byin antrénan… in vals, in polka, in séga byin élvé… oui ! Mé in dézord, in mizik sovaj k’i ral pa ou ditou, sa lé pa bon. Konm k’i diré, i vo myé ékoute silans la nuite plito. Pou anshevé, si in bann soi-dizan dansèr sansa dansèz l’apré bouzé, zéstikilé, fé batay la grèss èk lo zo… A, mé byinsir, méssyé lo rouj-de-fon lé pa d’akor èk moin ? Daoir sa mèm i apèl l’égalité rant bann kiltir ? Myé vo i lèss tonbé ! Tok, pran sa pou toi !

Justin la fé pou répons :
Mon vyé matante k’i koz touzour la boush rouvèr,
In n’afèr mi ème sanm ou sé oute léspri la rouvèrtir, sé out léspri la tolérans. Pars si lé vré na dé mizik ké ou i èm, é d’ote ké ou i ème pa… sé out droi, mé ou la poin pou komann lo droi lé zot. Myé, si mi di aou i fo ni intérèss sak ni konpran pa, donk ni aprésyé pa, zordi… pars domin, sar pétète sa ké nora nout préférans… dizon sar nout nouga montélimar. Myé ankor, mi di aou i fo ni réspèk lé z’ot mizik épi lé z’ot kiltir, nou nana in mèm konsidérasyon pou sa. Sa lété in méssaz inportan la MCUR. Ala pou kossa projé-la i doi pa rèss an rade. Shomin lé ankor long pou la konpréansyon inn-a-l’ote, la tolérans, é l’antante rant bann moun. Shomin lé ankor long ! Ti pa, ti pa, n’arivé !

Justin