Mézami dopi vinn-katrèr bande zoinal parlé i bassine anou avèk la sityassion d’covid La Martinik. Dopi 24 ère i panike toulmoune dsi in sistyassion dann linpass akoz laba konm issi l’éta la pa gingn mazine in politik santé éfikass pou anpar la popilassion konte lo maladi.

Pars pou mwin néna in n’afèr évidan sé ké lo virus épi son varyan apré fé déga dann Martinik lé pa né laba sa, li sorte déor é léta la pa vouli fé arien pou pèrmète noute bande konpatriyote martiniké viv avèk zéro virus konm la fé dann déssèrtin péi indépandan konm lil Moris nout voizin pli pré, konm Sésèl, épi konm La nouvèl Kalédoni an marsh diréksyon son lindépandanss.

Mwin la lir dann Témoignages déssèrtin dirijan la éskize azot pou la fote zot la fé dann lo politik sanitère – sa la éspass dann Macao d’apré sak mwin la lire dann nout zoinal. Biensir i fo pa atande k’in préfé, sansa in minist, pa mèm in prézidan franssé i domande éskiz lo pèp martiniké, mèm lo pèp rényoné kan tangaz va pété pou nou. Issi konm shé noute sèr – frèr dann bannzil zantiye va di sé nou lé résponsab. Konmsi lété noute fote si ni fé pa konfyans zot politik sanitèr té pa apropriyé.

Lo mèm koz i donn souvan dé foi lo mèm konsékans é sak i ariv zordi La Martinik lé riskab ariv La Rényon san tardé. Pou kossa ? Pars sanm pou mwin la solissyon banna la shoizi laba é i shoizi issi pou l’instan lé konm in kotère dsi in zanb do boi, in pansman initil. Alon pa kahyète anou déyèr in zèrb sin-Pol – noute ti doi – ni marsh dann savate bande martiniké é domin v’ariv anou sak zordi i ariv banna laba.

Mézami i rèss anou kék zour pou fé lo vèr é aprésa, mi panss nou ossi, nou va gouté.