Nout tout la dézà antann lo zésprésyon i sort déor, i di « konm ku ék shomiz ». Li arsanm pa gran shoz, mé konm zot i koné, li vé dir i antan byin, i kol ansanm, lé konplis, konm lo kor in moun ék son linz. Nou osi, nou néna lé not, i vé dir inpé lo minm zafèr, mé li lé bokou pli zoli a antann ké lot. Sak nou i di : konm shoushout ék la mori. Zot la konpri, sokousi, i fé référans nout rosèt kréol, nout gayar pla manzé, si télman aprésyé, k’ inpé i lish lo dwa.

Mé, mon kamarad, si shoushout i maryé byin ék la mori, lé pa lo ka ditou ék goyavyé, é pa sélman dann marmit. Zot i koné pa ? Dopi inndé zané, goyavyé La Plinn ék shoushout Salazi i fé la gér an distans pou la fèt i éspas lo minm sominn. Na pwin inn i vé sèd dovan lot. Sétané ankor, tou lédé i organiz zot konkour d’boté, lo minm sominn, lo minm wikinn la Pannkot, débi mwa d’zyin.

Lo Mér La Plinn i di, li la ékri in zoli lèt, konm li lé abityé fé, pou son lomolog Salazi, la pa réponn a li inntyor. Sak la o, lo Sirk, i fé pou répons : Son dat la fèt la fine arété dopi in sièk, li shanz pa aryin. Alé zoué kanèt, ou plito alé zoué pétank ! I arsanm dé marmay i shamay dann kour rékréasyon lékol ! Sa i fé pa séryé. Wa di a mwin, foutor, dann dépti komine, konm La Plinn ék Salazi, inn koté d’ lot dizon, anplis ék lo kantité problém nou néna, dé Mèr minm bor politik i gingn pa trouv in lantant pou in fèt goyavyé, in fèt shoushou ! I profèr ral lo kont ! Ousa nou sava konmsa ?

Anpliskésa, lé riskab minm domin na pwin d’fèt aryin, in koté konm délot. Akoz La Plinn, laba, dopi inndé sominn, tangaz i pèt dann la Méri. Dépa, la minm akoté, légliz i tranm. Sintagat lé pa kontan, Don Camillo osi, pou sa minm li ladésid rant dann ron. Lo film i fék komansé. Par koté Salazi, lé pa paréy, mé nout tout i koné, shoushou la gingn lo kou, la mank dolo, zot lé éstrésé. Zot la pwin in figir pou fé konkour d’boté . Alala lo tablo.

Antouka, ki fé la fèt ou pa, tousa pou di, lo konsta lé la. Lo zafèr lé grav. Si dé Mér dépti komine la Rényon, i gingn pa koz ansanm, i gingn pa tonm dakor, pou shwazi in dat maniféstasyon, alor, lo Rasanbléman pou nout péy, lé mal baré.

Pol