La séshrès l’apré fatig bann plantèr dann plis sinkante départman la Frans. In séshrès pli for ké dann l’ané 1976... in l’ané la bate rokor. In pé partou, bann plantèr i souplègn. Bann plantasyon mayi i soufèr vèy pa koman ! Lo pyé i lèv inn rant-rant, in pé i grandi, in pé lé shéti. Bann z’élvèr, in pé i va pi, i vann zot zanimo, i vann zot fèrm pars zanimo i kriy zour konm nuit pars la poinn lo. Na pi la paye non pli pou zot manzé ;

Partou lé konm sa ? Non, dann la moityé bann départman, i mank la plui, la otèr d’lo lé in pé fèb dann bann rivyèr, mé i gingn tienbo ankor in pé. Partou lé konm sa ? non ! Dann in départman i apèl l’Allier, la pa konmsa. Akoz ? Na poin la séshrès ? Nana, mé la-ba, banna la trouv in bon tik-tak. I ramas lo sal dann in gran vil i apèl Clermont Ferrand, i fé pas sa dann l’éstasyon l’aproptaz, i tir la bou nana dodan, épi i ranvoy le lo dann bann bitasyon pou aroz bann karo mayi. L’èr-la, mayi i pous konm k’i fo, é fouraz nana pou zanimo.

Bin ! Akoz i fé pa sa dann tout départman ? Pars dann l’Allier, la done l’otorizasyon pou fé in lékspérimantasyon. Donk, pou trouv in modèl pou lé zot kopyé dsi, l’Erop i done l’otorizasyon pars ziska zordi, lé défandi aroz bann plantasyon avèk sak i apèl lo gri, sansa in lo pankor bien apropté. Mé i komans ète l’èr pou pran in bon désizyon, pars sa i fé kék z’ané lo lékspérimantasyon i dir.

Mé shuttt ! L’Erop i réflèshi ! Konm di lo gro Nounours dann in vyé l’émisyon : pou marmay : « boneu nui, lé péti ! ».

 Justin