Zordi i nonm in nouvo prézidan konsèy réjyonal. Sar lo mèm ké l‘ansien, in bon prézidan pou vinn-sink pour san nout popilasyon. Ni souvien l’ané 2010, bononm-la la gingn z’éléksyon é li la signal ali konm in kassèr niméro in. Ni souvien li la prézant in program é li a dévir lo do avèk son program : dizon li la paf é sak li l’avé di li n’oré fé, é li la komans fèr sak lété pad itou dann son program. In l’égzanp ? La rout an mèr, sa lété pa prévi pou fé sa.

Astèr sré bon konète pou kosa vinn-sink pour san d’moun l’a vote pou li : pou in bon rézon, sansa pou in mové rézon ? In kékshoz k’i sava dann sans l’intéré nout popilasyon sansa non ? Zot i koné tout problèm i trakas nout parti é i pé pa dir sé bann fo problèm vi ké pou moin, zot sé in pé la klé nout fitir ? La késtyon kann, la késtyon nout l’agrikiltir, l’oktroi d’mèr, la lite kont l’ilétris, lo shomaz in mass de moun, lo mank de kaz, la mizèr d’moun, lo transpor d’moun épi marshandiz… Késtyon : i pé diriz in péi konm k’i fo san règ bnn problèm-la ? I pé sansa i pé pa ?

Si i pé lé bon pou li pars li anparl pa d’sa ! Si i pé pa lé bon pou li pars li s’anfoutsa mé ziska ousa nou v’alé ? Mon prinsipal késtyon : pou kosa vinn-sink pour san d’moun la vote pou li ? Pou kosa sinkant pour san d’moun la pa vote ditou ? I paré nana sondèr isi La Rényon ! Akoz zot i sonnré pa pou konète pou kosa demoun la voté ? Sa i an sèrvré kékshoz sa solman. Sré bien itil, non ?