Mon bann zamiy, mon bann dalon, mi vé rakont azot in zistoir : kroi si zot i vé, kroi pa si zot i vé p a mé mi pans sré pli préférab zot i kroi. Pou kosa ? Pars konm zot i koné Paul Vergès sé kant mèm in moun la tir signal d’alarm dsi lo réshofman d’klima é pa arienk sa vi k’li la domann limanité fé sak i fo pou évite bann gran katastrof konm sak i atann anou.

In kamarad téi akonpagn souvan nout défin kamarad in zour la di amoin. Zour la li l’avé diskite avèk Paul dsi la fonte bann glasyé é kan Paul la parl ali lo bann travaye bann savan épi lo danzé in bann in konsyan té apré fé kour anou é mèm nout kamarad l’avé di la goumantasyon la otèr d’lo 90 santimète té inn blag é téi fo miz dsi in minimom dé mète. Zordi bann savan i di sa, é nou néna tout rézon pou ète trakasé.

Mi sort lir in lartik dsi Bombay. Zot i koné vil-la i kont 21 milyonn moun é lo vil té konstrui dosi sète zil é la plipar an dosou lo nivo d’la mèr. Alor kosa i fo fèr ? Lèss fèr lé danzéré par raport lo bann rad’maré, lo rolèvman nivo la mèr épi ankor lo risk sounami é lo risk siklone -Si tèlman si i kontinyé konmsa la vil lé riskab disparèted’isi 2100.

Mé zami, gouvèrnman l’Ind l’apré sèye militariz loséan é mi pans li sré pli rézonab sèye sov son téritoir épi son moun konm sak i rèss dann grann vil la plito ké fé sak li vé fé koméla… Astèr Antansyon, si mi signal in gro risk konmsa la pa pou dir lé zot dor dsi zot dé zorèye, pars sof mon réspé, na poin pèrsone isi dann loséan indien épi in pé partou i pé pèrmète ali dor dsi son dé zorèye. Lé trist mé lé vré ! Lé tris mé lé konmsa !