Si désèrtin té i angaj zot résponsabilité...

I ariv ké désèrtèn pèrsone bien plasé i fé fèr bann koléktivité gran-gran dépans san tro oir la konsékans... In l’égzanp : in gran kolon l’ékipman i fé fèr gran-gran shantyé dsi in rout... Zot i koné sa i kout dé mil é dé san, é an plis ké sa, li gingn in prime an pasan, é apré, kan nana in déga pa prévi, la plipar d’tan, li lé pi la, li la fine alé in n’ot koté é pétèt li la fine ankès inn-dé prime an plis. Pandan éstan-la, i fo la koléktivité i trouv l’arzan pou réparé, rakomod lo z’afèr, é pétèt fé in n’ot rout zis a koté, an atandan d’ar-fé in troizyèm, épi konm la fine gingn lo gou, in katriyèm pli gran, pli larj, pli tout.

Par l’fèt, zédi, moin lété dann Tribinal administratif é moin té apré ékout lo madam té i roprézant lo Ministèr piblik. El té apré grinn désèrtin argiman an droi épi d’ot an fé... Tousa pou donn rézon la Réjyon Rényon... An moin mèm moin té i di : « Mi koné pa si madam-la i oi bien son résponsabilité, si èl i oi bien tout konsékans sa i pé an avoir pou bann Rényoné, pou nout z’anfan, mèm nout pti z’anfan ». Touléka, moin la pans èl té apré koz in pé la boush rouvèr, san bien pèz lo pour avèk lo kont, san mézir son résponsabilité.

Mi oi tout suit in pé va di, la pa lo Ministèr piblik k’i désid, donk ariv sak v’arivé par la suit, èl lé pou riyin la-dan. Zot i kroi vréman ? Lé vré, l’administrasyon fransèz i kas la résponsabilité par bout, konm sa in mayon dan la shèn sé in mayon, pa plis k’in mayon, donk lé pa nésésèr fé pèz dsi so mayon tout lo résponsabilité. L’èr-la, mi di dan mon kèr, si désèrtin té i angaj in pé zot prop résponsabilité, pétèt zot nora pa grinn zot shaplé san tro sousyé, san pran tout lo prékosyon k’i fo dan in n’afèr k’i pé angaj l’avnir in koléktivité. 

Justin