Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, moin la bien rogard dann télé lo rasanbleman bann rouj dann Sint-Sizane. L’avé dmoun mé pa si tan ké sa. Pason pou sa, mé sak mi vé dira ou sirtou sé sak mésyé lo rédaktèr-an-shèf lo JIR la di lo soir dann télé. Li la di PCR i lans dé z’idé, mé z’éléktèr i mank ali é kan ou la poin z’éléktèr, an tan ké parti, lé ak pou ou. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, moin osi konm ou moin la antann sak lo rédaktèr an shèf lo JIR la di mé sak mi rotien sé ké li la rokonète nout parti nana z’idé-promyé foi mi antann ali dir sa ! -mé sé pou li tap ankor pli for dsi nou, sé pou li dir PCR na pi z’éléktèr. Lé vré ké si lo z’idé nout parti lété myé koni n’oré plis z’éléktèr. Lé vré osi, ké dan nout parti, konm i di, in bonpé dirizan la tourn anou lo do é sé pou sa ké zordi l’opinyon i pans nou lé plat atèr.

An avoir z’idé sa i apartien pa toulmoun - a oir la droit konm lé sèk ! A oir osi parti sosyalis konm lé sèk galman ! - donk na in shomin k’i rouv dovan nou é shomin-la, si ni pran ali konm k’i fo, avèk sak i fo konm militan pou port nout z’idé. Konm Cataye, shantèr maloya, téi shant dimansh Sint-Sizane : « Si fo lévé, lès na lévé ! ». Ala lo vré késtyon, ala lo vré répons, matant. Tok ! Pran sa pou ou !

NB Cataye, si mi tronp pa lété shantèr dann lo group Dédé Lansor, in moun désédé zordi.