Moin la touzour pansé la roganizasyon La Rényon lé byin konpliké. Dann déssèrtènn sityasyon, sé l’État k’nana lo pouvoir, dé foi sé la Réjyon, dé foi ankor sé Konsèy zénéral, ou sinonsa bann kominoté d’komine ou byin bann komine zot mèm. Noré myé vali lé shoz té in pé pli sinp. Solman, zordi, lé shoz lé konm zot i lé, é zot i pé marshé ké si shakinn i réspèkt sak lé dann son pouvoir, san alé may avèk sak i rogarde pa li, é san fé lo razèr d’pinte*.
Malérèzman, lé pa toultan konm sa. An parmi bann razèr d’pinte patanté, nana l’État. Li doi bann départman tan k’sé t’assé. Issi mèm li lé rodovab Konsèy zénéral pou plis troi san milyon. Ou i kroi sa i zène ali ? Inn tyork ! La ministrèz l’Outrémèr la di gouvèrnman na poin l’intansyon ranboursé. É si ou lé pa kontan, pran konm ou i vé !
Sa i anpèsh pa la Réjyon fé son gran rin**, dépans larzan li la poin pou dépansé, vote in bidzé uit milyon pou la mobilité, alé oir sé pa li d’fé sa. L’èr-la, moin lé a d’mandé pou kossa Bogoss promyé, roi la Réjyon, i amène son bato an sharète shaviré konmsa. Pétète pou fé son joli ? Pétète pou bann gran grèk an avoir in bon l’opinyonn li. Touléka, sak moin lé sir, si i mank l’État sinkante santime pou fé in l’éro, li zènn ar pa pou poz galé*** la Réjyon. Sirtou, obli pa fé l’avans kan gouvèrnman nora pankor vèrs son par. É si gouvèrnman i pèy pa, trakass pa, sar pa la promyèr foi !

Justin

* razèr d’pinte : pirate
** fé son gran rin : fé l’inportan
*** poz galé : pa pèy son krédi