Matante Zélida la ékrir Justin :
Mon shèr nové, mon spès salté,
I fo mi di aou in n’afèr déssi tout lo bistrak k’i ariv zordi. Mi pans sé lo mank konfyans k’i konékans tou sa !
Akoz, zot, bann rouj-de-fon, zot i fé pa konfyans tout moun la oté ? Néna k’lé bon dann ta, kant mèm ! Si i di azot : i fo pèy lésans tan, sé k’i fo pèy ali tan ! Si i di azot : i pé pa donn travayèr in bon la rogoumantasyon, sé k’i pé pa ! Si i di azot : an parmi nou-mèm Rényoné, nana in pé sé d’tèt piosh, sé k’lé vré ! Alor, pou kosa an avoir doutans toultan ?

Justin la fé pou répons :
Matant, fransh vérité, m’a dir aou : i fé pa plézir pa kroir d’moun i gouvèrn anou ! Mé, ni koné, bann désidèr, i fo avèy azot konm dolé dsi l’fé... Si ou i avèy pa, in néstan, kastrol la fine anvèrsé é tout out nésésèr la fine gomé !
Ni vé byin kroir mésyé Préfé, mé li-mèm, li koné pa koman i kalkil lo tik-tak lésans ? Touléka, li di pa nou ! Si bann gro patron i di : zot i gingn pa rogoumant konm k’i fo bann travayèr, ni an apèrsoi, zour-an-zour, zot i gonf zot pla !
Alor, ala pou kosa, konm di Kréol, ni bat pa lé zyé, pars in pé va tir malol !

Justin