Sépa si sé pars mwin lé issi dann mon koin sansa si lé réèl pou d’bon mé mi antann pa tro parl l’avnir kann dann nout péi. I parl la koup kann, mé kan i ariv in n’afèr konm in pane l’izine, in grèv pou lo pri, in ralé poussé dann in balans. Sa i anparl, pars pétète bannde média i panss sé sa k’lé sèryé.

Lo sèryé la pa lo problèm de fon, lo sèryé sé lo wati-watia.

Poitan, mi pans i fo ni oi in pé pli loin ké lo boute nout né. Sa i vé pa dir, bann problèm zordi i doi pa z’ète réglé : li doi z’ète, mé i fo pa konfonn ali avèk sak ni doi apèl lo késtyonn fon... Lé vré tazantan, wi antann in pé avanss inn dé solissyon. Moin la fine anparl azot in plantèr sintandré té i di kont pa dsi li pou arash son kann épi plant ponm tèr.

Sa sé pa son tass lo thé.

Mwin la antann ossi bande plantèr apré dir : kann sa i ansèrv azot bien pou an avoir in pé la finans, lo krédi étsétéra, é sa i pèrmète azot sak zot i apèl divèrsifyé z’ot bann kiltir. Mwin la antann galman in plantèr apré di li sré pou kann l’énèrzi, donk pa pou fé dsik, mé pou gingn la limyèr. Défoi ou i antann dir Maurice laba i fé karbiran avèk kann mé pa iss.

Pétète la n’ot l lé pa bon pou sa. Kroiyé moi é fouté vou d’dan !

Si sa la pala pagaye, sa i rossanb bien pars i anparl pa l’avnir kann pou d’bon. Domaz pars néna dé shoz pou fé avèk noute kann, é ni rèss la, bra balan. Ziska pétète domin kann va vni in plant vèrt pou ansèrv konm dékorasyon sinploman.

In tristèss ! In shavirmann kèr !

Justin