Oté

Si i bouz pa plis ké sa, nout kann, domin va vni plant vèrt sinploman

Justin / 26 zwiyé 2018

JPEG - 43.6 ko

Sépa si sé pars moin lé isi dann mon koin sansa si lé réèl pou d’bon mé mi antann pa tro parl l’avnir kann dann nout péi. I parl la koup kann, mé kan i ariv in n’afèr konm in pane l’izine, in grèv pou lo pri, in ralé pousé dann in balans. Sa i anparl, pars pétète bann média i pans sé sa k’lé sèryé. Lo sèryé la pa lo problèm de fon, lo sèryé sé lo wati-watia.

Poitan, mi pans i fo ni oi in pé pli loin ké lo bout nout né. Sa i vé pa dir, bann problèm zordi i doi pa z’ète réglé : li doi z’ète, mé i fo pa konfonn ali avèk sak ni doi apèl lo késtyonn fon... Lé vré tanzantan, ou i antann in pé avans inn dé solisyon. Moin la fine anparl azot in plantèr sintandré té i di kont pa dsi li pou arash son kann épi plant ponm dé tèr : sa sé pa son tass kafé.

Moin la antann osi bann plantèr apré dir : kann sa i ansèrv azot bien pou an avoir in pé la finans, lo krédi étsétéra, é sa i pèrmète azot sak zot i apèl divèrsifyé z’ot bann kiltir. Moin la antann galman in plantèr apré di li sré pou kann l’énèrzi, donk pa pou fé dsik, mé pou gingn la limyèr. Défoi ou i antann dir Maurice laba i fé karbiran avèk kann mé pa isi pétète la n’ot lé pa bon pou sa. Na poin lontan, bann Téréos la désid fé in l’antropriz pou rafine do sik an misouk san domann plantèr z’ot poinn vizé.

Néna sirman d’ot shoz mé pou mon par mi oi pa sa konm in plan-pa pou sov kann solman - mé pou dévlop La Rényon. Lé vré gouvèrnman, l’erop épi Téréos i s’anfoutsa. Lé vré nout l’indistri kann la dévlop dann boite koton san agard sak lé posib fèr avèk kann é domin ? I anparl pa vréman pou d’bon. Domaz pars néna dé shoz pou fé avèk nout kann, é ni rèss la, bra balan. Ziska pétète domin kann va vni in plant vèrt pou ansèrv konm dékorasyon sinploman.
In tristèss ! In shavirmann kèr !