Lané 1789, lo roi Louis 16 an Frans i déside i fo trouv larzan pou fé sakifo fé dann son roiyom. Solman, si nana in n’afèr li vé pa, sé amorti in pé bann privilèz.
Alor, shak foi in minis i anparl ali bann priviléz, li mète lo minis déor. Sé konm sa li l’arash lo kro Turgot, Necker épi Calonne.
Mé fors-a-fors, konm demoun lé an kolèr, li fini par konvok lé États Généraux (lo klèrzé, la nobless é lo tièr-éta).

Pou li, i fo solman trouv larzan. Pou la plipar bann dépité, i fo réform la Frans, myé révolisyone ali : aboli bann privilèz, mète la démokrasi anlèr épi donn lo pouvoir lo tièr-éta.
Alor, pandan la nuit lo katr’août, bann dépité la désid aboli bann privilèz, épi zot la fé in sèrman zot i sépar arpa san avoir done in Konstitisyon lo péi. Firamézir, lé shoz la vni pli dir, ziska in zour la koup kolé lo roi...

Tansyon ! Mi vé pa dir i fo armète la guiyotine an sèrvis. Mi di solman i ariv parfoi ou i vé fé in n’afèr é ou i sava pli loin k’ou i kroi...
Lo prézidan la Républik la di : i fo fé zétazénéro. Bon pou sa mèm ! Si i fo étazénéré, akoz pa, alon étazénéré.
Mé tansyon pangar : i komans konm sa, épi i fini par in révolisyon ! Mé, si i fo, i fo ! In révolisyon, sré pa an tro… !

Justin