Oté

Si i gingn fé dé shoz, alon fé dé shoz, sito ké ni pé fé azot… i gingn avansé, alon avansé

Justin / 10 désanm 2019

JPEG - 43.6 ko

Matant Zélida la ékrir Justin :
Mon shèr nové, mon spès salté, rouj-de-fon dovan l’étèrnité, m’a dir aou in n’afèr mon anfan, i fo ou i koné kosa ou i di, kosa ou i vé pars afors shanj poinn-vizé mi diré ou l’apré konfonn otour avèk alantour-la, po d’shanm pou pla kouv èr, makaroni pou la bouji : Vi konpran pa sak mi vé dir ? Oila ! Sak mi vé dir lé sinp : tazantan ou i di, é mèm dopi lontan avèk lo sistèm néo-kolonyal, isi, ni pé pa avans plis ké nou l’avans zordi é dopi l’ané 1946-la loi d’ déparman. Mé oila ké zordi ou i mète a dir : i fo fé in plan pou tir d’moun dan la mizèr, i fo fé in plan pou tir La Rényon dann lo réshofman klimatik, i fo fé in plan pou débarass lo moun par raport la fain
Alor ! Siouplé i pé fé sa san shanj réjime, i pé pa ? Si ou i pans i pé pa, di i pé pa, di i fo l’otonomi. Astèr si ou i pans i pé, zot, lo parti rouj, zot na ka mète zot pandil a l’èr épi arète fé tourn zot disk rouyé... Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr, sé ou k’i déraye, sé ou k’i doi mète out pandil a l’èr… Matant, moin la di épi mi rodi san in vré dékoloniasyon i gingn pa shanj lé shoz a fon mé sa i vé pa dir i gingn pa fé désèrtènn shoz :
In légzanp : si Paul Vergès l’avé pa pèrd zéléksyon l’ané 2010 nou nora té fine gingn lotonomi énèrzétik. Oui sansa non ? Sansa nou nora gingn fé lo train : oui non ? si Paul Verès l’avé pa pèrd zéléksyon nou nora été bien sansa mal angajé dann shomin la lite kont lo réshofman klimatik : lé vré lé pa vré ?
Sa i vé pa dir nou noré fine trap nout dévlopman san pour san, mé sa i vé dir nou noré pi fé avans désèrtènn shoz… Matant, kan mi di sa, mi konfonn pa otour avèk alantour, po d’shanm pou pla kouvèr, makaroni pou la bouji. Sé pou sa zordi, mi di alon fé avans désèrtènn shoz kan ni gingn, sito ké ni gingn… San kroir ni pé gingn trap in vré shanjman san pour san si ni kass pa lo sistèm néo-kolonyal par morso. Tok ! Pran sa pou ou !