Mézami, mwin néna dan l’idé mi sorte antann kékshoz dann télé mi koné pa si lé vré pars sé in n’afèr i arsanm amwin li lé in pé drol é mi panss bann zami lé zanimo va trouv sa drol galman..si lé vré. Poitan lé possib lé vré pars lo roprézantan la CGPER la anparl de sa é konm banna lé sèryé mi kroi mwin la pa révé.

Ala l’afèr :l’ONF i fé in lof d’anploi pars li la bézoin anbosh troi pèrsone konm gardien osinonsa konm shassèr.Kossa banna va fèr ?I paré banna v’alé partou dan la foré épi va rode landroi néna koshon sovaz épi kabri maron.Iparé néna sa dann la foré é zot lé nuizib pou la foré.Alor bann bononm-la konm mwin la di vv’alé partou dann boi épi shak foi zot va rann azot konte néna tro koshon sovaz avèk kabri maron, zot va fé rapor épi va roganiz bann batu.

Mé si zot i romarke néna lo sha sovaz épi lo shien sovaz galman i di pa kossa zot va fèr pars pou linstan néna dë klalité zènmi sé sak mwin la di azot an-o la .Pou kossa mi di sa ?Pars dan lé-o konm dan lé ba néna lo shien i atake bann poulayé épi bann zélvaz kabri, mouton épi d’ote kalité zélvaz anklor.Mé wi pé pa fèr arien konte zot pars zot néna in propriyétèr mèm si lo propriyétèr i okipe pa d’zot.

O fète, kossa la CGPER i panss de sa ? El i panss lé kant mèm difissil aksépté k’in déssizion rapide i pé ète pri ofisyèlman konte bann koshon sovaz épi bann kabri maron alé oir na pwin in déssizyon konte bann propriyétèr lo shien sak i atake bann zélvaz.

Akoz la shanm lagrikiltir, sansa la préféktir, i anploye pa dé troi pèrssone pou fé lo mèm travaye ké bann moune i sava travaye pou l’ONF ?Mwin pèrsonèlman mi koné pa lo droi dann toussala osinonsa la zisrisspridanss….Mé mi doute pa ké kékpar, dann biro klimatizé néna bann zirist pou étidyé sa é trouv in moiyin roganiz la protékssion la foré, mé galman bann zélvaz .

A bon antandèr, salu !