Pou kosa mi arparl de sa ankor in kou ? Sé pars, mi lir dsi bann rézo sosyo dé troi kozman in bann moun progrésis, mèm kominis i di… Kosa banna i di ? Zot i di lo kapitalis sé lo kapitalis é li domine lo mond pa solman sète z’ot péi mé sète lé z’ot péi galman vi ké li lé mondyalizé.

Astèr zot i tir in konklizon é konklizyon la, mi doi dir mi partaz pa. Pou zot, bann mouvman pou l’indépandans, galman bann mouvman pou l’otonomi, konm PCR, ké lé pou la résponsabilité na tor. Pou kosa zot na tor ? Pars zot-nou ! Lo bann mouvman rényoné - i zap in n’afèr sé ké lo l’énmi sé lo kapitalis donk i fo amenn la lite kont lo kapitalis mondyalizé é dann lo mond antyé.

Dabor, moin, konm mon bann kamarad-mi pans !- nou lé pou la libérasyon sosyal, donk pou la lite kont lo kapitalis épi l’ésploitasyon bann travayèr. Nou lé pou sa de tou tan, é mèm dopi lo zour nou la fé nout parti l’ané 1959.

Donk, ni pans i fodra règ in kontradiksyon rant lo kapitalis épi lo pèp. Donk na poin libérasyon pou l’om si i libèr pa li avèk l’alyénsyon kapitalis.