Mi souvien dann tan na bien lontan, demoun z’ot kaz l’avé lo droi tyé in koshon-an touléka zot té i pran so droi-la !- é sa lété pou zot in manyèr pou gingn in pé la vyann épi ramas in moné. Sèl z’afèr, i falé méfyé si koshon té pa malad, pars lété pa tro bon a manjé. I paré désèrtin téi manj kant mèm, mé pou vann sa té in n’ot istoir pars kisa i sa ashté la vyann in zanimo malad ?

Sa i fé pans amoin in n’afèr. Zot i koné isi La Rényon bonpé bèf néna la leucose é la leucose sé in maladi. Kosa moin l’aprann dann radyo mardi soir ? Moin l’aprann mésyé lo préfé plis désèrtin sindikalis plantèr, i sava zordi mèrkrodi-donk la parti yèr !-dann sid pou manj la vyann bèf La Rényon, donk bèf lé bien posib la gingn la leucose é par sé z’antrofète plizyèr maladi i akonpagn leucose-la.

Donk dsi La promyèr, in zournalist i domann bann sindikalis si sé in bon l’inisyativ. Néna dé, inn sé lo prézidan La shanm, l’ot sé lo prézidan in sindika plantèr i di oui ! Sa in bon l’idé é mèm zot la di zot i sava manj avèk mésyé lo préfé. Na inn i di, sanm pou li, mésyé Préfé néna lo droi manj sak li vé é mèm si sé la vyann zanimo malad, mé in l’élvèr la poin la vokasyon pou vann zanimo malad é i tash moiyi n avoir son zanimo an bone santé.

Alor ? Mésyé lo préfé i pé manj sak li vé, pars dan La frans néna in l’ékol léna i ponn préfé a la shène donk la pa sak i risk manké. Mé nou rényoné, i pé fé manj anou la vyann konmsa i sort dann bèf néna la leucose ? A moins k’i di anou la leucose la pa ni in maladi, ni in rès mikrobi, in bèf lékozé sé in bèf normal.. si lé konmsa, mi oi pa pou kosa nou l’apré kozé. Nou pé anparl d’ot shoz !