Oté

« Si in moun la nyabou mète in zèf dann boutèye, sirman li sar kapab tiré par li-mèm »

In kozman pou la route

Justin / 4 mars 2021

JPEG - 43.6 ko

Mézami, zordi ankor ni sava oir in provèrb l’afrik. Sa i sorte dann la Répiblik démokratik congo, inn an parm bann pli gran péi néna dsi lo gran kontinan.. Mwin pèrsonèl, mi rapèl, péi-la lété in koloni La Belgique, é momandoné kan l’ariv la dékolonizasyon par-la l’ané 1960 in gran révolisyonèr popilèr lété viktime in kou d’éta é aprésa li lé mor dann in prizon : bonnonm-la téi apèl Patrice Lumumba é lété pa lo dèrnyé pou ète viktime bann kou d’éta é aprésa d’ète assassiné... An touléka, é pou roparl dsi nout kozman, mi panss sé in kozman pou kassèr lé kui, é d’apré sak mi konpran sa i vé dir a popré : si ou la tante in kékshoz inposib, ou na ka débarbote aou par ou mèm pou ou sorte dann lo malpassé. Poitan, mwin néna konm linprésyon mwin la lir par-la néna in téknik pou fé sa épi pou défèr sa, mé mi rapèl pi tro bien. An touléka, mi kite azot rofléshi la dsi é ni artrouv pli d’van. Sipétadyé.