Mézami, kozman-la, sa in drol zafèr.Pou koué ?Pars si ni pran kozman-la dann son sanss prope, sa i vé dir sak i gingn lo kou zordi va done lo kou domin.

Sa i rapèl amwin in déssin mwin la vi dann in zoinal, lo zour l’abolissyon lésklavaz :in zoinalist réakssyonèr i domande in zésklav libéré : astèr, kossa wi sar fé domin ?Lo zésklav libéré i réponde : « domin mi sar rode dë troi zésklav pou travaye pou mwin ! » Aprésa li kalkil in kou, li di : « Mé lésklavaz lé aboli alor kossa i sava ansèrv amwin ? »

Dann sète afèr baton i shanj pa d’boute pars si avan l’avé lo mète épi zésklav, astèr konm la pi zésklav la pi d’mète non pli. Nou lé pi dann lo même sossyété !é la sossyété la fé in bon kalitatif.

Ni koné zordi dann péi kapitaklist néna lésploitassion l’om ,par l’om. Si i siprime sa, nora pi d’lésploitassion l’om par l’om é nou sar randu dann in nouvo sossyété i gingn ar pi anparl lésploitassion l’om par l’om. Lo baton nora pwin la pène pou shanj de boute pars lésploitassion sar fine aboli.

Alé ! mi kite azot rofléshi la dsu é ni artrouv pli d’van. Sipétadyé.