Oté

Si in zour kouvèrtir marmité i pète sar zis pou l’imanité !

Justin / 20 févrié 2019

JPEG - 43.6 ko

Matant Zélida la ékrir Justin :
Mon shèr nové, mon spès salté rouj-de-fon dovan l’étèrnité, si mi konpran bien nout prézidan konm lé zot avan i tard pa pou désidé fé travaye in pti pé bann moun i travaye pa épi i toush lo RSA é biensir sa i anraj bann rouj-de-fon. Mé pou kosa ozis ? Pétète pars pou zot in salèr la pa lo kontroparti d’in travaye. Pars pétète pou zot, ou i pé ramas lo mou épi toush out moné an dous é san sokous. Moin k’i kroiyé té i falé transpiré pou gingn son soso, ala éstèr mi antan dir lé normal toush larzan san travaye, épi travaye o blak pou aport in pé dobèr dsi lo zépinar. Mon nové, ou i pans pa zot lé vyé zé, épi dépasé dann zot rofléksyon. Modèrn é zot sé dé, an touléka ! Pran sa pou ou !

Justin la fé pou répons :
Mon vyé matant k’i koz touzour la boush rouvèr, m’a dir, aou in n’afèr moin lé dakor avèk lo formil shakinn solon son travaye é in zour nou v’ariv la formil : shakinn solon son bézoin. Mé sak moin lé pa dakor sé k’in pé i gonf z’ot pla ziska pété é anplis i diminyé zot zinpo , é mèm i ankouraz zot frodaz fiskal..
Lo normal sé in partaz bann rishèss osi égal ké posib é sirtou k’i arète in pé avèk la sirésploitasyon bann zonm épi bann fanm. Konm i fé dopi dé tan é dé tan, san zamé shèrsh in bon lékilib rant lé z’inn épi lé zot ; an pliské sa m’a dir aou lo zour l’imanité sar fatigé avèk in sistèm lésploitasyon é bin kouvèrtir marmité va pété é sar zis k’i pète ; tok ! Pran sa pou ou !