Médam, Mésyé ! La sosyété, koz èk moin sé koz èk in kouyon mé sé o pyé d’lo mir k’i oi lo bon mason. Mé zami, mi pans néna in gran leson dann kozman-la. Lokèl ? Sinploman ou i pé pa fé in n’afèr tousèl souvan dé foi. Dizon ou i pé paf é tout tousèl. Biensir kann i pouss, li grandi, li fé son shimik pou done son zi sikré mé pou d’sik sé in n’ot afèr. Dann kozman i parl moulin mé proférabléman i fo parl lizine avèk in prosésis asé konpliké pou sort an lo pou vni an sik. Si ni kalkil bien bonpé zafèr dan la vi lé konmsa : si ou i transform pa lé konmsi ou l’avé poin arien ditou. Mèm la vi dann la sosyété lé konmsa : l’èrla in kozman l’afrik i vien dann mon tète. Kozman-la i di konmsa : pou grandi in marmaye i fo tout in vilaz. Mi arète la, é mi kite azot kalkil kosa i lé lo vilaz-kosa i lé tout in vilaz - koman son bann rouaz i mète inn avèk l’ot, é ni artrouv dann in kominoté édikativ. Alé ! Mi kite azot rofléshi la dsi é ni rotrouv pli d’van. Sipétadyé.