… Avansa l’avé d’ote kissoi droite, kissoi gosh é mwin la zamé pran lo tan poz amwin la késtyon si mwin téi doi èm azot, sansa détèst azot. Fransh vérité, pou mwin sa sé in problèm bann franssé d’ franss é pa in problèm pou mwin rényoné.

Arzoute èk sa lo « émé » sé in problèm mal pozé. Si i anparl émé, pétète i fo ni azoute « èm son politik » sansa « em son fasson diriz lo péi, règ bann problème konm lédikassion nassyonal, l’agrikiltir, l’orde piblik ». L’èr-la mi panss bann moune La franss i pé poz azot in késtyon konmsa.

Mé nou La Rényon, demoune l’oséan indien, déssandan demoune i sorte inpé partou dsi la tèr, avèk noute prop lang, noute prop kiltir, noute problèm, mwin lé siréssèrtin lo Prézidan La franss son politik i pé pa z’ète bon — vréman bon — pou nou issi dann loséan in dien.

Son promèss, si li fé, sa i doi pa réissir pars sansa i voudré dir li lé kapab règ noute bann problèm anou é sé pa lo ka, la zamé été lo ka, é opliss i sava, opliss sar konmsa… Fransh vérité mwin la touzour été pou lotonomi La Rényon é mi panss sé sa k’i pé pèrmète anou d’sov anou pou vréman. Antouléka règ bann problèm i konssèrn anou o pli pré, dann noute l’anvironeman.

Zot va dir amwin la Prézidante konsèye réjyonal lé rényonèz ; el i koné La Rényon. El i pé z’ète an kapassité pou règ bann problèm La Rényon, mé zot i koné bien èl la poin lo pouvoir pou règ noute bann problèm anou. Déssèrtin oui, ptète, pars la konpétanss lé éklaté rante plizyèr zinstitission : l’érop li, l’éta li, konnsèye réjyonal li, konsèye départmantal li… si tèlman li travaye dann in lojik projé, mé pa dann in lojik pou règ noute problèm.

Alor toultan ké nou nora poin lotonomi — sansa in l’antante rante rényoné, pou dir sak i fo pou nou é koman ni doi fé avanss sa, é koman nou va égzèrs la konpétanss k’i fo pou sa, m’a touzour dir nou na poin lo zoutiye k’i fo pou règ noute ban problèm lo pli difissil donk ni poura pa. Fé avanss in n’afèr konmsa. Lo Prézidan i gingn ar pa, toute bann zinstitission i gingn ar pa non pli. Donk konte pa dsi mwinpou èm demoune na poin lo zoutiye k’i fo pou fé bien avanss noute péi. Karte lé pa dann noute min in poin sé tou.

A bon antandèr, salu !

Justin