Dsi la késtyonn l’anvironeman shak zour prèske néna son mové nouvèl. So matin nou la aprann in n’afèr lé pa bon ditou pou l’imanité. Bann zom de syans la kalkil in n’afèr pèrsone téi atann pa. Zot la kalkil lo konsékans lo réshofmann klima i pé an avoir dsi bann niyaz bass koush.

Pou kosa zot la parti étidyé sa ? Pars néna lontan zot i koné bann niyaz-la i anpar in pé la shalèr é zot i zoué lo rol in klimatizèr pou la tèr. Mé oila, sak zot la trouvé i fé ankor pli pèr.zot la trouv lo réshofmann klima lé riskab diminyé la koush niyaz i ansèrv anou konm klimatizèr !!! Donk si la koush nyaz i afayi, la tanpératir lé riskab rogoumant ankor in pé plis-in bonpé plis. Zordi i baz dsi uit dégré anplis lo réshofman normal.

Si dann lo syèk proshin la tanpératir i rogoumant la kantité banna la di, la glas bann pol va fonn, donk nivo d’lo la mèr va goumanté... Pétète plizyèr mète é pou anshové demoun i gingn ar pa siport in rogoumantasyon la tanpératir konmsa. La fin di mond ? Pétète pa pou toutsuit mé alon méfyé bann fénomène i asosyé inn avèk l’ot pou donn firamézir bann konsékans an toboz é plizanpli an toboz pou l’imanité.

Nou té i vienn aprann lo spès kanikil ni koné sé par raport dolo la mèr l shof an sirfas é ni bate rokor la shalèr firamézir : 2018 pli sho k’2017, astèr i di 2019 sar pli sho ankor épétète pli sho sar l’ané 2020. Mé zami i fé pans amoin fime Disney kan Donald té apré koup lo bransh li téi asir dsi. Final de kont l’om lé pa pli fité ké Donald é li galman li l’apré koup la bransh i siport ali.

Dir ké ni pans l’om sé lo kréatir lo pli intélizan. Bin si lé vré l’om kapitalis i fé pa parti so katégori intélizan. Sirman pa !