Mi pans, zot osi, zot la byin suiv sak la spasé, sak i spas ankor an Gwadloup. Mi mazine zot osi, zot la ékout bann moun apré shant in gayar shanson : « La Gwadloup sé tan nou, sé pa ta yo ! »...
Pétète, galman, zot la suiv in pé la sérémoni pou la mor in sindikalis dann in éstade, an parmi kat mil pèrsone par-la. Demoun i shant épi i dans, la famiy lo défin i plèr épi, toudinkou, i arète pléré épi i shant épi i dans dousman-dousman... Zanploiyé ponp finèb i shant, i dans épi i lèv lo poin !

In zournalis la Frans la trouv sérémoni mortyèr-la konm in spès meeting, vi ké li, pèrsonèl, li té i konpran pa sak té apré éspasé.
Mi pans, nou, avèk nout tradisyon maloya, nout régué, nout shanté révolisyonèr, nout kultur, mèm si nou té isi, nout kèr lété la-ba.

Zistoman, moin té apré mazine sa kan R.F.O., zédi matin bardzour, la pas in shanson Danyèl Waro : i fini par "La Rényon lé ta nou, lé ta bann Rényoné".
Oté ! Ala k’lo son i bès, k’la voi lo kozèr i kouvèr sète lo shantèr, épi i antan près pa la finisyon.
Alor, ékspré, pa ékspré ? Si la pa fé ékspré, bon ! Zot lé adroi konm zozèf-a-gosh. Mé si la fé éksopré, alor banna la insilt anou ! Fransh vérité !

Justin