Lékol i mank pa nou : pti lékol, lékol primèr, kolèz, lisé, ziska linivèrsité nou nana. Z’amontrèr i mank pa nou, épi bann pèrsonèl i tourn otour konm papiyon-la-lanp. Bann médsin i suiv bann marmay. Si ni port bien antansion, nou na moiyin nouri bann marmay konm i fo. Poitan, foutor, na poin bann rézilta k’i fodré.

Apré sa, a s’ki prétan, nana plis 100.000 lilétris dann La Rénion, an parmi, konbien z’andikapé sosial : plis i sava, plis shomaz, pti kontra, lasistans i mont déssi zot konm karapat su tété bèf mèg. Sa in sérié problèm pou nou sa lé ga !

Lé vré, bann jènn, kan zot lé bien instruyé, zot lé pa garanti trouv in bon boulo pou gingn in bon moné. Zot galman i ral lo diab par la ké. Solman, lo ka bann lilétris lé pli an zobok sète toulmoun. Alor, in min i lav l’ot : akoz pa mète bann diplomé pou ède bann zilétré, kondision donn azot lo pourkoi ?

Antansion ! Lé bien bèl parl dévlopman dirab, téknèrzi, lénèrzi nouvèl, lagrikiltir kalkilé, lo ko-dévlopman : tousala va kas par bout si demoun kalifié na poin an sifizans. Koman nou fé domin - zordi déza - si la matièr griz i mank anou ?

Justin