Oté

Si la pa moins é in n’ot ! In kozman i pé fé fèr bann drol de shoz

Justin / 30 octob 2018

JPEG - 43.6 ko

Mi pans zot i koné, dann moiyin Oryan néna in gran rivalité rant L’Iran épi l’Arabi Saoudite é inn konm l’ot i vé domine la réjyon. Poitan lé dé sé bann péi mizilman donk normalman noré du avoir in bon l’antant rant inn épi l’ot mé la pa lo ka. Mèm la rolijyon i diviz azot pars l’avé konm i di dann listoir in shism rant bann mizilman chiite épi bann mizilman sunnite : in wati-watia i romont dopi la mort Mahomet. Inn konm l’ot i vé z’ète lo gardien l’Islam épi inn konm l’ot i vé an avoir la sipèryorité dann la réjyon.

Bann péi l’oksidan i mète luil dsi l’fé kansréti par lo komèrs bann zarm. Mé antansyon bann péi l’oksidan sa sé d’apré zot lo bann shanpion lo droi dé l’om. A komansé par La Frans épi son bann prézidan dopi lo promyé ziska lo dèrnyé. Lo dèrnyé pou son par i roul ali dann drapo droi de l’om. Si i rode lo pou dann son tète ala ké li di : si la pa moin k’ivann lé zarm sé in n’ot. Sé pou dir lo drapo bann droi dé l’om lé tapissé avèk bann gro-gro biyé.

La Frans : sa in drol de péi sa ! d’in koté li brandi lo létandar lé droi de l’om épi l’ot koté li brandi l’étandar larzan. Kosa zot i di dann mon trou d’zorèye ? Zot i di bien, « konm tou lé z’ot » ! Nou lé dakor mé akoz lo droi dé l’om ? Akoz libèrté, égalité, fratèrnité ? Tousa pou gingn lo droi ‘ète dézyèm déyèr l’Almagn pou son l’ékonomi. Akoz lo fran Cfa ? Ankor pou ète dézyèm dann l’erop. Ankor si lété pou ète promyé mé mi oi pa pou kosa lo péi i vann son l’am konmsa.

Patri lo droi de l’om ? Sèryé kan in zanfan prézidan Gilbert Mitterrand i vann a l’ankan la bibliotèk son papa, olèrk done sa l’éta, sansa done sa in fondasyon. Pli mèrkantil ti krèv ! Mé mi arète la, san pran insitasyon avèk in l’ansien patron téi apèl Gallois-fine lèv lo pyé zordi - li téi di konmsa : si la pa moin sé in n’ot ! Ala in kozman i pé fé dor amoin avèk mon sèr. Sof z’ot réspé.