Na in dalon la di amoin konmsa, dopi li intérès kiltir La Rénion, li an apèrsoi toultan li dékouvèr in nafèr an plis : kisoi in fonnkèr koméla sansa dann lansien tan, kisoi in séga, kisoi ankor in shanté sansa inn roman. Nout péi lé jène, mé son kiltir i bouyone, konm k’i diré na poin arien pou kal ali.

Zordi sé la késtionn ko-dévlopman dann la kiltir l’apré travay amoin, akoz la-dan galman i pé parl sa : akoz pa ? É lé ga ! nana bann péi kréol dann nout rézion, dann Sésèl, Moris, Rodrig. Mi trouv nout travay-ansanm lé in pé mol. Lé vré, Kassiya i vann son séga La Rénion, bann group morisien i vien zoué dann bal, i pass bann diks dann radio, mé sak lé militan, sak lé kiltirèl, ni oi pa, ni antan pa.

A par bann péi kréol, nana péi nout bann zansète : sa i fo pa ni oubli. Lé vré, ni koné prèss pa z’ot lang : malgash li, komor li, tamoul li, shinoi li. Mé nou lé pa forsé rèss dann fénoir. Bann lang-la i aprann sa ! Sar bon pou nout ko-dévlopman, sar bon pou nout zénès, sar bon pou nout lékonomi... Mi pans pa nou la pèr banna : si zot nana z’ot gou d’sèl, nou ossi nou nana la n’ote.
Viv ansanm dann nout loséan indien, sa nout déstiné ! Si la pa zordi, sar domin !

Justin