Moin na souvnans ti lékol Boi d’Nèf, dann tan-lontan, kan vakans té i ariv. Dèrnié zour lékol té in zour d’fète : la té i zoué la ! la té i fé salad mang ! la té i shante ! mé sirtou sak mi rapèl bien sé kan bann marmay té i sort dan lé o té amenn flèr.. tout sort kalité flèr : zazalé,dalia, zéyé, roz, kamélia épi d’ot ankor. Sa té i sort Plato-flèr, in landroi oussa , dann tan lontan lavé in gran kaz,siklone lavé fine kassé, avèk in gran zardin . zardin la rèss la épi la kontinié donn flèr an kantité.

In zour, vakans l’arivé mé bann marmay la pa amenn in takon flèr konm dabitid ; kan la métrèss la demann pou kossa, banna la réponn aèl : « Lo blan l’ashté landroi, épi li la pass katérpilar partou..na pi in sèl pié flèr ! »...la zourné té mol pars nout zié téi rode bann flèr nana dabitid épi té i trouv pa.

Akoz mi mazine sa ? Akoz, na dé-troi zour, moin la parti La Montagn, in landroi i apèl Zardin Sandriyon : la nana plant par santenn, bann plant la rénion mé galman bann plant i sort in pé partou... sak i done flèr, sak i san bon, sak i done bann frui, latizane tousa-la. ; I paré lo propriétèr èk son madam la mète soisant -dizan pou fé zardin-la. Vréman gayar...

Vréman gayar ? Non ! pars moin na konm dan lidé sé in zardin an finn vi : na pi pèrsone dann la grann kaz...In moun i fé lantretien bann plant mé inn sé zour ? I paré la Sodiac l’ ashté la kour...Donkalor i tard pa an avoir limèb se landroi-la ! E le bann plant ? katèrpilar va règ zot kont : konm la règ le kont plato-flèrpiton Boi d’Nèf, konm la règ lo kont tamarin koté l’égliz Sin-pol. In patrimoine an plis fouti an l’èr, si la rézon i pran pa la plas la foli déssèrtin moun.

Justin