Mi koz pa toratravèr. Pa pou kraz in moun par dérièr. Li mèm i di, li déklar forfé. Lo minis di travay li mèm. Li vyinpabou sogonn èk lo shomaz dan la frans. Shomaz la gingn lo dési. Li di osi, li lé dann in tramay é pa zordi la vèy pou shapé. Dikou li rann lé zarm. Li dékil. Mé tasyon pou rotan li sava pa pou sa. An pliss, o lièr okip in pé bann shomèr, odrémié pran an kont zot sityasyon, plito li gaskongn a zot, konmsi zot néna la gal konm lapin. Sipozon zot néna pou vréman la gal, la pi in minis i fo a nou, i fo war in doktèr. Anon ranplass lo minis par in doktèr di kou. Mazinn in kou ou lé malad, pou fé sanblan, ou néna la gal parlfèt, ousinonsa in maladi grav, in maladi dir pou géri, in maladi émérzan konm i di, kiswa parkinnsonn, kiswa alzéymèr, ou na lo shwa, kiswa géri èk tizann sinp ou sinonsa alé war doktèr, i donn a ou médikaman mé in mandoné i fo fé lo bilan pou war si lé géri pou d’bon ou si néna kontrayété, si i agrav.

Mazinn in kou touzour, doktèr la i di a ou, mi vyinpabou sogonn èk out maladi, mi rod, mi rod mi trouv pa. La, out kanar lé nwar, dizon, la mor lé d’si ou. Koué i fo fé ? Odrémié lèr la, sanz médikaman, kiswa sanz doktèr ou kiswa ankor sanz lé dé. Mé fé kékshoz. Lo minis i di pa sa li. Li di, mi vyinpabou dèmay a zot mé kont ankor si mwin, pétèt ké pétèt.A nou dan nout travay ni pé pa di, mi gingn pa fé, mé mi rès, patron i bat a ou déor. Si ou gingn pa fé, shapp. Dapré mwin, pa solman anddann la i tourn pa ron, dan dot séktèr osi mèm séga mèm dans. Bann éspésialis i di fo shanz tout avan i dégrinn. Dan tout konpartiman, laba déor konm isi lé parèy.

Si déor i trouv pa solisyon parl pi pou nou isi, plis de 130000 moun,30/100, i kour dérièr, trwa fwa plis ké déor i di. Zot i donn larzan pou sa, si ankor té i anbosh èk lo larzan, si té i ansèrv pou la formasyon ? Ankor ! Bann patron, i ankès mé travay oki. An plis i di patron, plito bann gro zabo, non solman i ankès é apré i rodistribié èk bann zaksyionèr. Donkalor gouvérman lé konplis èk zot. In koté i tourn lo do èk bann promèss 2012, i fyonn a nou, in ot koté i okip byin la finanss. Alorss, aforss amass la mantri, invant la krak, gouvérman va dégréné. Si la tonbé, ni lèv pi !