Yèr moin la fé in modékri dsi la késtyonn done in nom bann siklone é moin lété fatigé oir La frans apré mète son kiyèr sal dann marmite i kui pa pou li. L’èrla, moin la ékri bann patriyot rényoné i anval poisson par la ké avèk bann gouvèrnman fransé. Donk ala mon késtyon : pou sak i pans zot sé dé patriyot rényoné, konbien i pans an mèm tan La frans sé nout patri galman. Moin lé sir néna in bonpé !

Moin la fine antann souvan défoi demoun apré di : « Nou lé fransé avan bann moun i rèss dann la Nice épi dann La savoie. ». Donk nou sré fransé avan banna vik’La frans la pran posésyon d’nou dopi disétyèm syèk, é Napoléon 3 l’ashté Nice épi La savoie nou té fine dépass 1850… Mi koné mèm in pé i pans zot i doi sakrifyé azot pou lo l’intéré nasyonal pars sé sa k’i kont an promyé. Néna osi sak i di zot lé fransé par la kart lidantité. Sanm pou moin néna in bonpé nyans dann nout santiman par raport La frans.

Mi rapèl bien kosa bann frankréol l’avé pou di dsi sa : zot téi di zot néna dé kalité patrotis é zot i shanj pa inn pou l’ot. Zot lé patriyot par rapor La Rényon é zot lé patriot par raport La frans. Zot kèr i bate pou lé dé é pa arienk zot kèr pars inn-dé rant banna la fé la guèr zanglé kan la débark shé nou, épizapré la parti fé la guèr kont bann zotrishien é d’ot kan banna la atak La frans.

Pli pré dann tan, néna demoun konm Paul vergès épi Bruny Payet la angaj dan La frans lib épi kan zot la rotourn isi zot l’amenn la lite dsou drapo l’otonomi... Moin pèrsonèl mi santiré amoin dann lo fil bann gran konbatan-la é mi pans zot drapo i doi pa tonm atèr konmsa é i fo demoun pou rolèv sa. Mézami souvan défoi pou konprann lo prézan i fo ou i koné lo passé : yèr i ésplik zordi é zordi i doman anou pa obliye sak nou lété yèr é dann kèl shomin ni vé alé.

Oui, mi antan d’isi in pé apré di dann mon zorèye, in pozisyon konmsa ou l’apré rode kou d’baton i sort dé koté. Pétète lé vré, mé mi kass pa tro la tète pou sa, si in zour la vi i doi done amoibn rézon.