Si mi poz azot késtyon dsi dèrnyé match foutbal rant Madagaskar ép La répiblik congo ? Si mi domann azot si zot lé kontan nout voizine la gagné dimansh soir kont bann kongo-pars Madégaskar la gingn o tir o bit – mi koné pa bien kosa zot va réponn amoin.
Moin lé sir in pé va di zot lé kontan pars Madégaskar lé in pé famiy avèk nou : néna in bonpé paranté rant listoir épi lo popléman La Rényon épi Madagaskar. D’ot lé riskab dir zot i konpran pa so kari-la-mélanj k’i fé zoué bann rényoné donk bann fransé avèk lékip Madégaskar. Mi pans d’ot ankor va di zot i kass pa la tète pou sa pars sé pa z’ot afèr.

Moin pèrsonèl kosa mi di ? Dabor mi di, dann l’éspor an zénéral, si désèrtin néna in doub nasyonalité zot i pé shoizi fé konpétisyon avèk in péi sansa in n’ot. Zot i koné dann fotbal néna d’moun bi-nasyonal la désid alé zoué avèk in péi sansa in n’ot péi si i fé apèl azot. Mi di ankor dann rigbi lo fédérasyon lé pli koul ké dann fotbal.
Lé vré sé la promyèr foi in fédérasyon – sète Madégaskar – i aksèp fé zoué dann son lékip demoun néna zansète dann lo péi. Sa i roprézant in l’ouvèrtir ankor pli gran. Néna in ga i apèl Jérémy Morel : sa in zouèr lékip Lyon, li la zoué galman dann lékip Marsèye. Li la anvoye in mésaz lantrénèr lékip malgash épi li la di : « Koach, mi vé pa vol la plas pèrsone mé mi di aou mon papa lété malgash ». Lo koach la roténir ali dann lékip malgash.

Alor kosa i pé dir dsi in ka konmsa, konm dési sète fontaine, épi d’ot ankor pars néna sète zouèr néna paran malgash l’apré amenn konpétisyon La Can. Mi pé dir azot sa sé in n’afèr moin pèrsonèl mi aprésyé sirtou ké toudinkou ni rann anou kont sa in bann rényoné é si bann rényoné i pé ède Madégaskar fé in bon koup mi oi pa pou kosa nou va fé nout tète koshon. Na poinn rézon, sirtou si sa i fé in raproshman rant nou épi bann Madégaskar é tout sak i pé raprosh nout dé pèp lé bon pou lé bon pou zordi, lé bon pou domin é lé bon pou nout l’avnir ansanm-ansanm dann loséan indien.