Souvan défoi mi poze awin késtyon dsi lo rol tèl é tèl zénérassion. Mi pans par égzanpe la zénérassion 1946 é mi di anmwin-mèm kossa èl la fé pou noute péi ? Apréssa mi panss la zénérassion 1959-la date nout parti lé éné – lané la lannss lo mo d’ord « lotonomi » avèk toultan lo mèm késtyon : kossa li la fé pou lo péi… Mi pé ankor anparl la zénérassion la vanz konte la frode éléktoral, sète légalité sossyal, épi sète la réjyonalizassion, aprésa néna in gran krë avèk la fin la pèryode Verzèss. Avèk touzour lo mèm késtyon.

Demoune konm mwin la gingn konm privilèze travèrss in bonpé zénérassion, i koné lé shoze la shanj in bonpé : in pé an bien, in pé an mal… toute fasson sa sé lo bilan noute pèp é ni vé ni vé pa, i fo ni assime. Konm in gran lékrivin téi di : ni pé pa shanje lo pèpe kant mèm ! Si bande zélite i panss lo pèp la pa vote konm i falé, zot i pé panssé, mé la pa la fote lo pèpe mé sète momandoné la panss zot sé l’élite ; é zot lété pa pou vréman..antouléka zot la pa fé sak i falé fère pou klère nout shomin épi rouv ali dann la doirékssyon téi falé ni sava. Kissa kla fote si shomin té mal indiké é si tazantan nou la tronpe dirékssion.

Mézami, sèryèzman, mi panss tazantan i fo fé lo bilan d’in pèpe é oir kossa la fé an bien é kossa la fé an mal. I pé oir ossi kissa lété bande jéni pou lo bien é kissa lété bande jéni pou lo mal. Koman i oi sa ? Par létide, par lo travaye é konm i di avèk bande zékipe pliri dfisciplinère : in pé istorien, in pé zéogaf, déssèrtin ékonomist, d’ote linguiste, d’ote ankor sosyolog, é toussa travayan, dsi in même sizé lo pèp rényoné dopi 1946 ziska zordi. Mi panss sa sré valabe é mèm si lé tar, lé zamé tro tar pou nou konète anou pou vréman.