Mézami, néna pli lontan ké lontan, mwin lété étidyan dann sid La franss. Mwin lété dann in l’asosyésion, biensir, é bann zétidyan Paris té dann in n’ote asosyasion téi apèl Union Générale bann zétudyan kréole La Rényon (UGCR). In délé gasyon la sorte dann kapital La franss pou rann anou vizite dann sid. Té valab, banna l’avé zot shanté é in ga téi zoué la guitar épi téi shante bien.

Kozman mwin la mark an-o la lété dann in shanté é kan mi panss zordi ankor mwin la pwin kafar mé la nostalji. Sirtou kan mon péi i travèrs in zone tanpète. Pars li travèrse in zone tan pète, konm in bon pé péi néna dsi la tèr é lété pa paré pou ankèss in shok konmsa. Pou kossa oziss zot lété pa paré pou ankèss lo shok ? In kaz kan li lé fé dsi lo sab, é si son fondasyon i antère in pti guiguine dan la tèr sansa dann sab, lila pa solide ditou.

In n-dé bon rafal lo van i bate ali atèr. Lo kourante I ral ali d’issi d’laba, konm in bato fou. Raz d’maré I kapote ali konm in fétu la paye. Opliss mi rogarde mon péi, opliss sanm pou mwin li lé faye, opliss li lé la apré aspèr mové tan pou bate ali atèr é plish son guèl. Mé pétète zot I konpran pa sak mi vé dir, pétète zot I pans domin solèye va lèv pou toulmoun ? Pétète, mé mwin lé pa sir zot rézoneman I tienbo d’boute.

Mézami, mwin lé dann in parti la zamé aksèpte fasson lo néokolonyalism I panss noute lékonomi I doi diriz ali. Mon parti, kan li rogarde La Rényon, li oi sa konm in péi dévlopé épi li di é li la amontré, noute péi par kèl shomin li doi dévlopé. Nout péi lé pa dévlopé, in péi an kroissans san dévlopman. Alor si in pé i tir, konm i di la vyand griyé dann fé, la plipar i ral lo dyab par la ké. Ou k’i lé in lagrikiltir bien misklé ?la pa la. Oukilé bann zizine transformasyon ? Lé pa la sansa néna trépé. Oussa i lé noute lindistri la mèr ? Lé pa la. Oussa i lé noute lotonomi alimantèr, noute lotonomi énèrzétik ? Lé pa la. Oussa i lé laplikasyon noute vinnsink poin konm n oute parti i vé ? Lé pa la non pli.

Sé pou sa, pou ropran la shanson bann zétidyan kréol La Rényon dann lé zané Soisante mi di : si lé vré « la korde i kass koté li lé faye » par oussa li doi kassé ? Koté li lé faye bien antandi.